یہ شعر عاشق ِ رسول حکیم الامت علامہ محمد اقبال کا ہے۔اس میں انہوں نے قرآنی سورت آل عمران آیت نمبر ۳۱ کا مفہوم و مطلب بیان کیا ہے۔ ترجمہ:’’(اے محبوب) آپ فرمائیے (انہیں کہ)اگر تم (واقعی) محبت کرتے ہو اللہ سے تو میری پیروی کرو(تب)محبت فرمانے لگے گا تم سے اللہ اور بخش دے گا تمہارے لیے تمہارے گناہ اور اللہ تعالیٰ بڑا بخشنے والا نہایت مہربان ہے‘‘۔ جب یہود کو اسلام کی دعوت دی گئی تو انہوں نے یہ کہہ کر اس دعوت کو قبول کرنے سے انکار کر دیا کہ ہم تو پہلے ہی محبت الٰہی سے سرشار ہیں اور اس کے لاڈلے فرزند ہیں۔ہمیں کیا ضرورت پڑی ہے کہ کسی نئے کی اُمت میں داخل ہونے کی زحمت گوارا کریں۔ اس آیت مبارکہ میں انہیں تنبیہ فرمائی جا رہی ہے کہ محبت الٰہی کا دعویٰ بغیر دلیل معتبر نہیں اس کی دلیل یہ ہے کہ تم اللہ تعالیٰ کہ اس برگزیدہ رسول کی اتباع و اطاعت کرو۔ اگر تم نے دل و جان سے اس رسول اکرمﷺ کی اتباع کی تو تمہارا دعویٰ محبت بھی درست تسلیم کر لیا جائیگا۔اور اس کے علاوہ اللہ کریم کی ایک سب سے بڑی نعمت سے بھی سرفراز کیے جائو گے یعنی تمہیں محبوب الٰہی ہونے کا شرف بخشا جائے گا۔ حضرت محمد مصطفیٰ سرکار دو عالم نور مجسم ﷺ کی عظمت و شان اور جلالتِ قدر کا کیا کہنا کہ جن کی غلامی یہودیوں ایسی راندۂ درگاہ اور ذلیل قوم کو بھی اللہ تعالیٰ کا محبوب بنا سکتی ہے۔تو اگر اُمت سرور کائنات کے سانچے میں اپنی سیرت کو ڈھال لے تو کیا یہ محبوبیت کی خلعت فاخرہ سے نہیں نوازی جائے گی؟چنانچہ اس آیت مبارکہ کے مطابق اگر مسلمان تاجدارِ انبیاء، حضرت محمد مصطفی ﷺ کی اتباع کریں تو اللہ تعالیٰ وعدہ فرما رہا ہے کہ میں تمہیں اپنا محبوب اور پیارا بنا لوں گا۔ اور جب تم میرے دوست اور حبیب بن جائو گے تو میری تمام مخلوق تمہارے ماتحت ہو جائے گی ۔حتیٰ کہ لوح و قلم میں فیصلے بھی تمہاری مرضی سے تحریر کیے جائیں گے۔؎